عم مغاوري مشيلني همه

عودا مجددا لا اعرف هل اعود و اكتب مقدمة عم مغاوري اما ابدأ من الحلقة الاولى على

العموم ح اعيد كتابتها مرة اخرى فهى فى الاصل مخصصة لهذا الاتحاد

*************************

عــــــــــــــــــــم مـــــــــــــغاوري

عم مغاوري هو رجل بلغ السبعين من عمره دب الشيب في راسه و دب العجز في

عظامه, اما النحية البدنية فانك تحس انه قد مات اربع مرات من قبل و ان هذا هو هيكله , و مع ذلك فان عم مغاورى متـصابي حتى النخاع فقد ذهب الى الست ام خليفة الخاطبة تدورله على عروسة , و ام خليفة دى الخاطبة بتاعت الحارة ….اسف الكلام خدنى عن عم مغاوري و نساني اقولكم هو عايش فين او اوصفلوكوا بيته عم مغاوري عايش جوه حارة في حي شعبي متبلط ببلاط البازلت ـ اي حارة و اي حي ـ المهم و انت داخل الحارة حتلاقي على ايدك اليمين قهوة المعلم عطعوط ـ دى غير القهوة اللى بيقعد عليها سندباد ـ و اللي لابس جلبيه مخططه ده و مربي شنبه هو المعلم عطعوط , و اللي واقف ورا النصبة ده على كتكوت و اللي هناك ده ـ ايوه اللى بيحط الطلبات هناك ـ صبري الحمى و بعديها ح تلاقي عم رضوان صاحب محل العصير ـ ايو هو التخين اللي قاعد على باب الدكان و اللى جوه ده الواد حوده ـ بص بقى الناحية التانية ـ ايوه كده شايف الراجل الاسمر اللي لابس عفريته ده ايوه ده ده بقى الاسطى شعبان ـ ده بقى بيحب سنية بنت الست حميدة اللى بتبيع فجل و جرجير في نص الحارة ايوة دى الى هناك على الشمال , اما الواد اللى جنبه ده فهو مسعد ده اسمه مش صفته خلينا نكمل كويس لحقناه قبل ما يروح يصلى الضهر ده اللى هناك ابو دقن بيضا ده بقى عم الحاج رجب صاحب بقالة الزهور , ممكن نمد شويه دى عربية الفول بتاعة عم حسين , خلاص .. خلاص وصلنا البيت اللي هناك ده بتاع عم مغاوري , اوعى تخاف من الراجل اللى جاي ده , ده عم ابو الليل راجل طيب و غلبان , ما تحولش تكلمه ده اخرس , البيت اهه زي مانت شايف عبارة عن دورين بيت قديم قوى بيقولوا من عصر الخديوي اسماعيل اتفضلوا ما تخفش السلم خشب و شكله قديم بس متين ـ بس اطلع براحة ـ ايوه الدور التانى ,ده شقة عم مغاورى اهو فتح لنا الباب . شقة عم مغاورى مكونه من ثلاث حجرات و مطبخ و عفـشة ميه و صالة فيها طربيزه مدورة و كرسيين انتريه اسيوطي قديم و كنبة بلدى …… اتفضل اقعد عم مغاورى دخل يعمل الشاي وجاي ….., عايز ايه ؟ تعرف احنا جايين هنا ليه ؟ ليه هو انا ماقولتلكش ؟لا صحيح ؟!!!!!!!!!! اصل عم مغاورى طلب منى اكتب مذكراته و قرر يحكيها لي فقلت اجيبك معايا تسمع …..

و إلى اللقاء مع الحلقة الاولى من حكايات عم مغاورى مشيلني همه