إلي عصبة اتحاد مدونين

صباح الخير يا جماعة

و الله أنا كان في بالي موضوع بخصوص الاتحاد كنت عايز اتكلم فيه..

بس قبل ما أدخل في الموضوع أنا عايز أوضح حاجة..

أنا لما جاتلي دعوة الانضمام للاتحاد كنت مبسوط خالص يمكن لأني عندي ميل بالفطرة للعمل الجماعي..أو يمكن لأتها ممكن تكون فرصة إني اتعرف عن قرب بناس ممكن يكون عندهم نفس الحس بالهم العام ..مش عارف الصراحة اية اللي خلاني أكون مبسوط..

بس الحاجة اللي أنا فاكرها كويس..إن قلت لأدم في تعليق من التعليقات إن الموضوع ده محتاج تنسيق في الكتابة والعمل..دي كانت وجهة نظري ..

التنسيق أنا بشوفه مهم علشان أسباب كتير ..كان أهمها في نظري محاولة ايجاد توجه عام في المدونة..بمعني نبقي فاهمين إحنا بنعمل اية؟ و بنعمل كدة لية؟..مش إحنا و بس ..ده كمان الناس اللي ممكن تيجي تقرالنا هتبقي مين و ليه برضه

برضه كنت شايف إن التنسيق مهم علشان العمل ما يبقاش عشوائي

..يعني ما أعتقدش إن اتحاد المدونين اتعمل علشان كل واحد من اعضاء الاتحاد يجي
يرميله كلمتين في بوست و خلاص علي كدة

..العشوائية دي هي اللي وصلت المدونة للشكل اللي هيه فيه..أنا الصراحة بحس بكدة كل مرة أمر فيها..موزاييك غير متناسق تماما..مفيش خط واضح..مفيش روح..و دة صعب عليا استحمله..

فياريت يا جماعة يا أعضاء الاتحاد نشوف طريقة نتواصل بيها و نحاول ننسق بشكل أو بآخر..نحاول نتفق علي خطوط عامة للحركة ..علشان عيب أوي ننتقد الناس المتنلين بستين نيلة اللي حاكمنا بالعشوائية و احنا ماشييين علي نفس الطريق